Med heftige rytmer, konspirasjonsteroriar, kampen mellom det gode og vonde og stor spelarglede, har tiandeklassingane ved Tau og Jørpeland fått kjend på det ekte musikallivet.

Song, dans, lokale referansar og politikk fylte scena då tiande klasse ved Jørpeland ungdomsskule inviterte til årets store musikalsatsing. Med utgangspunkt i den folkekjære forteljinga om Folk og røvere i Kardemomme by har elevar og lærarar laga si heilt eiga, moderne framsyning: Katakombeby. Her fekk publikum møta både velkjende karakterar – og meir uventa innslag som Donald Trump, JD Vance og Elon Musk i nye og humoristiske roller. Ei musikalsk historie som både speglar samtida og tek vare på den leikne tonen frå originalen.

Også ved Tau ungdomsskule har tiandeklassingane invitert på musikalframsyning. Der sette dei opp utdrag frå den kjende musikalen Grease, til begeistra respons frå publikum. Med solide sjølvlagarekvisitter, svingande dansetrinn og fengande songar viste dei at musikaltradisjonen står sterkt i kommunen.

Ryfylkepuls var så heldige å vera til stades under førebuing og framsyning av både Katakombeby og Grease. Kreativitet, samarbeid og innsats går igjen begge stader. Gjennom intense veker etter nyttår har elevane arbeidd med manus, program, kulissar, song, dans, scenografi og teknikk. Elevane fortelat dei har blitt betre kjende på tvers av klassane, og at samhaldet veks når dei jobbar mot eit felles mål. “Me får mykje betre fellesskap”, slår Joseph Jassin ved Tau ungdomsskule fast. Resultatet er rett og slett imponerande!

Musikalprosjektet er meir enn bare ei framsyning. Lærarane ved Jørpeland ungdomsskule legg ikkjeskjul på at det ligg mykje arbeid bak ei slik satsing. Lange dagar og detaljert planlegging er ein del av pakken. Likevel er dei tydelege på at det er vel verd innsatsen. “Når alle er med, på sine måtar, så er det jo miljøbyggjande”, seier lærar Svein Kåre Lauvsnes, som saman med Roar Fjelde var regissørarog hadde hovudansvar for musikalen på Jørpeland ungdomsskule. Dei ser kor mykje elevane utviklarseg, og korleis prosjektet skaper minne for livet. Fleire elevar blir tryggare på seg sjølve og tar med seg verdifull erfaring – ikkje minst med tanke på munnleg eksamen, karakterar og avgangsfag som kjem i løpet av våren i tiande klasse. “Det er ein verdi som strekkjer seg ganske langt ut over det som skjer bare desse vekene”, seier Roar om prosessen rundt musikalen.

Årets pulssending byr altså på både latter, alvor og musikalsk energi. Frå Katakombeby sine dagsaktuelle skråblikk til rocka 50-talsstemning på Tau. Og ein ting er i alle fall sikkert: Kreativiteten lever i beste velgåande blant ungdomane våre!

Sjå sendinga her: Ryfylkepuls – Sjå siste sending her – ryfylkealliansen.no
Du kan også sjå Ryfylkepuls på TV Vest – Forside