Skulefinalane i Ryfylkequizen er utført, med spenning, engasjement og tårer. Me står att med 27 motiverte ungdomar, som skal til den store direktesende finalen i mai.
Åttandeklassingar i heile Ryfylke har gjort ein iherdig innsats og tileigna seg mykje kunnskap om Ryfylke. Dei har lese pensum, testa kvarandre og laga eigne kahootar i klassen. At dei har jobba godt, viste seg i eit skyhøgt nivå i skulefinalane. Me er skikkeleg imponert av elevane og gler oss stort til den store finalen. Deltakarane var engasjerte og vinnarlaga kunne ikkje koma raskt nok i gang med vidare øving. At det er stort konkurranseinstinkt blant elevane, og at det betyr mykje å koma vidare, er ikkje vanskeleg å sjå. Enkelte tok det så seriøst at vedkomande måtte ta seg ein tur ut på gangen etter at sigeren var klar, for å tørka tårer.
Målet vårt med ein slik quiz er at ungdomane i Ryfylke skal lære om plassen dei bur på og plassane elles i Ryfylke. Me vil at dei skal kjenna ein tilhørigheit til distriktet, og at dei er klar over kva moglegheiter som finst her – både kva gjeld næring, fritidsaktivitetar og stad å bu.
Skulefinalane er gjennomført, og det er nå klart kven som skal representera klassen og skulen i Storfinalen på Fjelltun skule i Strand kommune onsdag 22.mai. Hugs at du kan følgja finalesendinga direkte på desse sidene frå kl.12.00.
Ryfylkequiz blir gjort i samarbeid med Hjelmeland Sparebank, Sauda kommune, Suldal kommune, Hjelmeland kommune, Strand kommune, Stavanger kommune, Sandnes kommune.
