Petter påstår det er inga sak å ta over Ryfylkepuls og vera reporter. Han meiner han er meir eigna til å presentera skulen og sjekka pulsen blant medelevar og rektor enn dei vanlege, gamle og kjedelege pulsreporterane. Får han rett?
I denne sendinga tar Petter Hauge Løyning med på innsida av Sauda vidaregåande skule. Han sjølv er andreårselev på studiespesialisering og er i frå Sauda. Petter tar ein prat med medelevar på skulen og stiller rektor Dag kritiske spørsmål. Elevane fortel om ein skule som har lærarar som er inkluderande og motiverande. Skulen har mange fritidsaktivitetar ein kan velja å vera med på ettermiddagar og kveldar. For mange elevar er tilreisande og bur på hybel eller Campus, og då er det kjekt å vera ein del av dette miljøet også etter skuletid. Det er mykje som skjer; treff på Alfred, mekkekveldar og skikveldar, volleyball, fotball, symjing og grilling.
54% av skuleelevane kjem tilreisande utanfrå Sauda. Rektor Dag Bjønnes ved Sauda vgs understrekar at skulen er avhengige av desse elevane for å oppretthalda tilbodet som er i dag! Han fortel om dei spente minutta ved søknadsfrist til vidaregåande skular. Kor mange søkjarar er det i år? Er fordelinga nokolunde lik på dei ulike studieretningane? Det er gode søkjartal for skuleåret 2025/2026 , og fleire av linjene har fleire søkjarar enn det er studieplassar. – Nå blir det spennande kor me står etter at første opptak er gjort i juli, seier Dag.
Tord Hetland og Olav Bakka Dybing prøver seg også som reporterar og besøkjer både Vg2 Elektro og Vg2 Kjemi og prosess. Dette er klassar som har mykje praktisk arbeid i skulekvardagen sin. For mange er dette særs viktig i val av studieretning. Og Sauda vgs har mange praktiske linjer ein kan gå på.
I denne får me altså innblikk i kvardagen ved Sauda vidaregåande skule. Me blir også kjent med Instagramkontoen ryfylkeZett og ikkje minst presentert for den nye prisen “Ung Ryfylkehelt” som skal delast ut under Ryfylkequizfinalen 21. mai.
Sendinga ser du her: Ryfylkepuls – Sjå siste sending her – ryfylkealliansen.no
